Sallaqxana

Allahım mənə dəyişdirə bilməyəcəyim şeyləri qəbul etmək üçün
SƏBİR
Dəyişdirə biləcəyim şeyləri dəyişdirmək üçün
CƏSARƏT
Aradakı fərqi görə bilmək üçün
MÜDRİKLİK
Bəxş et!

Dünyalıların öyrənməli olduğu yeganə şey bu­dur, əgər onlar kifayət qədər yorulublarsa, pis gün­lərə fikir verməsinlər və diqqətlərini yaxşı gün­­lərə cəmləsinlər.

Makey yazırdı ki, Uşaqların Səlib Yürüşü 1213-cü ildə başlayıb. İki rahib Almaniya və Fransada uşaqlardan ibarət ordular yaradıb qul kimi Şimali Afrikaya satmaq fikrinə gəliblər. Üç min uşaq könüllü olub. Onlar elə bilirdilər ki, Fələstinə gedirlər. Yəqin ki, bunlar böyük şəhərlərdə yaşayan evsiz, avara uşaqlar idi. Axı yalnız belə özbaşına və arsız uşaqlar hər şeyə hazır idilər, deyirdi Makey.
Üçüncü Papa İnnokenti də elə bilirdi ki, uşaq­lar Fələstinə yola düşürlər və bu fikir onu həyə­canlandırırdı.
– Biz yatan vaxt bu uşaqlar tətikdə olurlar!– deyirdi Papa.
Uşaqların çoxu Marseldən gəmiylə aparılmışdı və yarısı gəmi qəzalarında ölmüşdü. Digər yarısı isə Şimali Afrikaya çatdırılandan sonra satılmışdı. Bəzi uşaqlar anlaşılmazlıq nəticəsində Genuyaya getmişdilər. Burada onları qul gəmiləri gözləmirdi. Buradakı yaxşı adamlar onları yedirmiş, sığınacaqla təmin etmiş, bir az pul və çoxlu məsləhət verərək evə geri göndərmişdilər.